Ggloge
Es Gsprèuch zwusche de Héli Habicht ound em Chàschpi Cheuïzli.
Héli Habicht: Éétischi Prinzypje spiled jé lènger jé méé en entschàidendi Role–n i de Politik.
Chàschpi Cheuïzli: Wië chounnsch jétz ouf daas ?
H.H.: Es mags àifach nume lyde, das en fuërende Politiker luugt, souscht mouës er gaa.
Ch.Ch.: Ych glawb ééner, er muës gaa, wànn er verwutscht wirt.
H.H.: Tànk doch, wo’s ouhs-choount, das de Clinton vor Ggricht ggloge hàt, daa isch en Empeuhrig ggfàgt dour t’Méédië vo de–n U.S.A, waas sàgi, ggfàgt dour dië ganz Wàlt. Droum hàt er muëse daas Impeachment uber sych ergaa laa, ound blos will en Louhg bi so me Ggavaliërsdélikt ééner tdouldet wirt, hàt er ’s uberstande.
Ch.Ch.: Èumel hàt’s neud vill mit Politik z’touë gghaa. Aber dou glawbsch doch neud, das dèè Prèsidànt worde wèèr, wànn er neud im Waalkampf ggloge hétt wië tdrouckt, blos hàt me–m ’s neud cheune naawyse.
H.H.: Daas sàisch dou. Aber tànk doch a p’Fraw Kopp. Wànn dië ires Télifoon mit irem Maa grad zouëggèè hétt, so wèèr si im Amt pblibe. Schliëssli–ch isch dànn déét ouhs–choo, das me sym Kliànt nuut Verbottnigs hàt cheune naawyse.
Ch.Ch.: Psinn di doch. P’Fraw Kopp hàt vor irer Waal wàiss wië muëse–n ire Maa i Schoutz nèè ound vo Schlammschlacht réde. Màinsch, deby héig si stàndig nou dië loouhteri Waret ggsàit ? Nànài. Sy isch als éérschti Boundesrèuhti vo Lingge–n ound Frawe béjoublet worde, aber dànn mèrked dië, das si dië féministische Poschtoulaat doch neud e so vertritt, ound soo isch si missliëbig worde. Das si daas Télifoon apgstritte hàt, isch droum vile–n enttuuschte Luut grad ràcht choo.
H.H.: Aber dèè Prèsidànt in Oungarn. Wo dèè syni Luuge–n im Waalkampf zouëgit, chounnt er stàndig Probléém uber.
Ch.Ch.: Ébe daas màini. Es wussed doch ali z’Oungarn so gouët wië souscht ouf de Wàlt,. das en Politiker mouës luuge, wànn er wott Ggarièère mache. Aber mèrke tèurff me’s neud, ound grad zouëgèè, ooni das me muësst, daas isch de greuhscht Fèèler, daas verzéit àim niëmer.
H.H.: Aber grad jétz. Scho gséét’s ouhs, de Sàmi Schmyd héig syni Affèère–n uberstande gghaa, aber sit me wàiss, das er ggloge hàt, sind pleutzli–ch ali Partéje gàg’ ihnn.
Ch.Ch.: Ych vermouëte–n ééner, de Hèr Boundesraat Schmyd, imerhy en gstoudiërte Jourischt, héig neud emaal réalisiërt ghaa, das Neuhtigoung fur de Poschte vo me–n Armééschéff kài Empfélig wèèr. Ubrigens, wà me sych ouf pstimti béruëmti Génerèuhl ous de Wàltgschicht psinnt, so hàt er womugli gaar neud so Ouràcht. Aber nach dère Kander–Trageuhdje, de Kaaderwaalprobléém, ganz apgséé vo de–n Aafindige vo–r Èss–Vaw–Péé, isch jétz na daas létschte Treupfli dezouëchoo, wo ’s Fass zoum uberlawffe bringt. Jétz wirt aw na de létscht Politiker muëse mèrke, wie féscht em Sàmi syn Stouël scho ggwagglet, ound das’s sych neud loont, dèè z’stutze, blos zoum e Partéi èrgere.